3 წლიანი ისტორიის მქონე თბილისიმარათონი უკვე გახდა საერთაშორისო ყოველწლიური სპორტული ღონისძიება და ამავდროულად, ძალიან წარმატებული სოციალური პროექტი, რომელსაც ორგანიზებას ჰაიდელბერგცემენტ კაუკასუსი უწევს

რიგით მესამე ნახევარმარათონზე, რომელიც 2014 წლის 25 ოქტომბერს გაიმართა, 2000-მდე მსურველი დარეგისტრირდა. რეგისტრაციიდან შემოსული თანხა - 15630 ლარი ჰაიდელბერგცემენტმა ტრადიციულად გააორმაგა, ჯამური ოდენობა კი ბედიანის ბავშვთა ცენტრის მშენებლობას მოახმარა.

თბილისიმარათონი 2014 პირველი ინტეგრირებული ნახევარმარათონი გახლდათ, რომელშიც მონაწილეობა შეზღუდული შესაძლებლობის 10-მა პირმა მიიღო. გარდა ამისა, პირველად თბილისიმარათონის ისტორიაში, შეზღუდული შესაძლებლობის მქონე პირები ჩართული იყვნენ ღონისძიების საორგანიზაციო საკითხებშიც.

ღონისძიების გამარჯვებული ზედიზედ მეორედ, ანატოლი ოლეინიკოვი გახდა, რომელმაც ფინიშის ხაზი საათსა და 13 წუთში გადაკვეთა. ქალთა კატეგორიაში გამარჯვება კი ვალია ავაგიანმა მოიპოვა, რომელმაც ნახევარმარათონი საათსა და 38 წუთში გაირბინა. მონაწილეთა შორის იყვნენ ჰაიდელბერგცემენტის, სხვადასხვა ქართული და უცხოური კომპანიების, ასევე სამინისტროებისა და საელჩოების თანამშრომლები.

„თბილისიმარათონი“ ნახევარმარათონად (21.0975 კმ) კლასიფიცირდება, სადაც მონაწილეობის მიღება ყველა მსურველს, მოყვარულსა თუ პროფესიონალს, შეუძლია.

„თბილისიმარათონი“ მსოფლიოში აპრობირებული წესებით ტარდება:  გამოიყენება გერმანული კომპანიის Mika Timing სისტემა „Official Timekeeping and Data Processing”, რომელიც გამოცდილია შტუდგარდის, ფრანქკფურტის, ჰამბრუგისა და ბერლინის მარათონებზე. ნახევარმარათონის შედეგებიც სწორედ ამ სისტემით დაითვალა, რომელმაც უზრუნველყო ღონისძიების სამართლიანად ჩატარება.

ღონისძიება თბილისის მერიის, გერმანიის საელჩოსა და სპორტისა და ახალგაზრდობის საქმეთა სამინისტროს პატრონაჟით ჩატარდა.

ჯანსაღი ცხოვრების წესის დანერგვა და ქველმოქმედება ჰაიდელბერგცემენტის შიდა კორპორატიული პოლიტიკის ნაწილია, სწორედ სოციალური პასუხისგმგებლობის გაზიარება წარმოადგენს თბილისიმარათონის ჩატარების ძირითად მიზეზს.